Babangamiwe n’abanyerondo babishyuza amafaranga y’irondo ku ngufu, bamwe bakanakubitwa

Bamwe mu baturage batuye mu Murenge wa Tumba baravuga ko babangamiwe n’abanyerondo babasanga mu ngo zabo bakabishyuza amafaranga y’irondo ku ngufu, ndetse utayafite agakubitwa. Nimugihe ubuyobozi bw’Akarere buvuga ko bwashyizeho ingamba zirimo no guhana abafite iyo myitwaire itari myiza.

Hirya no hino mu gihugu, umuturage aba asabwa kugira uruhare mu kwicungira umutekano. Mu bice by’ibyaro usanga umuturage arara irondo, mugihe mu bice by’umujyi, uruhare rwe rugaragarira mu gutanga amafaranga yishyurwa buri kwezi, agahabwa abakora irondo ry’umwuga.

Icyakora mu karere ka Huye, mu murenge wa Tumba, abahatuye bavuga ko aba banyerondo baho bahengera igicuku kinishye cyangwa mu rukerera bakabasanga mu ngo zabo, bamwe bakiryamye bakabishyuza aya mafranga y’irondo.

Abaturage baganiriye n’Umunyamakuru w’Isango Star, bavuga ko iyo baje kwishyuza uyabuze baramushorera bakamujyana ku biro by’Umurenge kandi bakagenda bamukubita. Ibikorwa basanga atari iby’I Rwanda.

Umwe yagize ati : “ Icyo gihe twari turyamye, ari mu rukerera ! Noneho ibaze uri umupfakazi uryamye hamwe n’abana, uri indushyi idafashe noneho umwana agasigara wenyine, Umwana ashobora gukura afite agahinda ku mutima. Rwose ibyo bintu byo kuza kwishyuza butaracya… rwose mutubwirire Moyor ko ibintu biri mu nzego zo hasi bimeze nabi kuko bagakwiye kujya bagendana ikinyabupfura.”

Undi yunze murye maze agira ati : “Urumva bazana amahiri ! Noneho kugusanga mu rugo n’ubuhiri uri umuntu w’umugabo, rwose ntabwo aribyo ! Rwose bafate mutekano abe ariwe ijya kwishyuza, naho kugusanga ku buriri uri umuntu w’umugabo, uraryamye hamwe n’umugore n’umwana, noneho ushidutse baguciraho urugi ngo tanga amafaranga y’irondo ! Ubwo se urumva ibyo bakora ari byo !”

Yongeraho ko“ariko se umuntu w’umukecuru ugiye guca inshuro, bamusanga mu rugo ngo tugende ! Nonese ubwo arabaha ibyo abana biririrwa ?!”

Ange Sebutege ; umuyobozi w’Akarere ka Huye, avuga ko nabo nk’ubuyobozi bagiye bumva iby’iki kibazo ariko hashyizweho ingamba. Avuga ko kwishyuza amafaranga y’irondo bitakiri mu nshingano z’abanyerondo, akanemeza ko hari abagiye bahutaza abaturage bagomba kubihanirwa.

Ati : “icyo twabwira abanyerondo, ntabwo bakwiye guhutaza abaturage uko byagenda uko kose, kuko byagiye bigaragara mu murenge wa Tumba. Hari abanyerondo barimo abakurikiranywe mu mategeko, ari abahagaritswe muri izo nshingano kubera imyitwarire mibi… turagira ngo tubwire umuturage ko dushyigikiye ko ahutwazwa ariko nawe yumve inshingano ye.”

Yongeraho ko “ ibikorwa byinshi tugeraho ni uko hari umutekano. Icyo gihe rero iyo babikoze mu buryo butari bwiza, bishobora no gutuma umuturage yumva wa musanzu we awutanga kandi atishimye. Ariko tubashije kwibwiriza, byanakoroha.”

Nimugihe abaturage bavuga ko mu gihe cyose iki kibazo cy’abanyerondo babakubita cyaba gicitse mu Murenge wa Tumba, barushaho kwisanzura bagakora batekanye ndetse bakanishyura aya mafaranga y’irondo nta ngingimira bafite.

@REBERO.CO.RW

Leave a Reply

Your email address will not be published. Required fields are marked *