Rayon Sports yatsikiye ubwo yanganyaga na Police FC

Rayon Sport FC 1-1 Police FC  mu mukino w’Umunsi wa 25 wa Shampiyona  wabereye kuri Stade ya Kigali i Nyamirambo kuri uyu wa Gatandatu tariki ya 30/04/2022.

Police FC  niyo yakiriye uyu mukino idafite abakinnyi bayo b’ingenzi  harimo Kapiteni wayo, Nshuti  Savio wagize ikibazo cyo kuvunika na myugariro wayo Moussa Omar ufite amakarita atatu y’umuhondo.

Rayon Sports yatangiye umukino  yabanje hanze abakinnyi bayo bingenzi barimo Kapiteni wayo Muhire Kévin , Ishimwe Kévin, Léandre Onana na Musa Esenu.

Ntibyayibujije gutangira ishaka igitego  mu minota 10 ya mbere yahushijemo uburyo bwagaragara ko havamo igitego, aho umupira wa mbere watewe na Sekamana ujya ku ruhande rw’izamu naho undi watewe n’umutwe wa Maël Dindjeke ujya hejuru Gato.

Police FC yatunguranye ifungura amazamu ku munota wa 11 ku gitego cyinjijwe na Rutanga  atsinze ku mupira wahinduwe na Iyabivuze Osée wari iburyo abanje  gucenga Mujyanama Fidèle.

Nyuma y’iminota ine Police itsinze Rayon Sports yishyuriwe na Rudasingwa ku mupira wavuye iburyo uhinduwe na Maël Dindjeke witwaye neza muri uyu mukino kuva watangira.

Bageze ku munota 61, Maël Dindjeke yahushije uburyo bwabazwe ku mupira yinjiranye mu rubuga rw’amahina ariko birangira  umunyezamu Ndayishimiye Eric Bakame amwitambitse.

Kwizera Pierrot na Rudasingwa Prince basimbuwe na  Muhire Kévin na Léandre Onana mu minota 25 ya nyuma.

Ku munota wa 71, Police FC yasigaye ari abakinnyi 10 mu kibuga nyuma y’uko Twizeyimana Martin  yakiniye nabi Léandre Onana wari hafi kugera mu rubuga mwizamu na Police FC

Nishimwe Blaise yahushije ubundi buryo bwabazwe ku munota wa 74 ubwo yateraga  umupira yerekeza  kwa  Léandre Onana, usanga  Bakame  yasohotse neza  awukuramo.

Mu minota ya nyuma, Ndizeye Samuel yavunitse asimburwa na Ishimwe Kevin. Kunganya uyu mukino byatumye Rayon Sports igira amanota 42 ku mwanya wa gatatu,  Police FC yagize amanota 36 ku mwanya wa gatandatu.

@M.Rukundo Dona

Leave a Reply

Your email address will not be published. Required fields are marked *