CEDEAO/ECOWAS yafatiye ibihano Leta ya Mali

Abategetsi b’ibihugu byo mu karere k’ Afrika y’uburengerazuba bafatiye ibihano Mali nyuma y’aho leta ya gisirikare itangaje ko amatora yari ategekanijwe mu kwezi kwa kabiri kuyu mwaka yigijwe inyuma igihe kirekire.

Abategetsi b’ibihugu bigize ishyirahamwe ry’ubucuruzi rihuza ibihugu byo muri ako karere, CEDEAO/ECOWAS, aho bari bateraniye Accra muri Ghana ejo ku cyumweru bumvikanye ko ibihugu byabo bifunze imipaka ibihuza na Mali, hamwe no gushyira mu bikorwa ibihano bitari bike mu bijyanye n’ubucuruzi.

Abategetsi b’akarere k’ Afurika y’uburengerazuba basabye ko ubutegetsi busubizwa abasivire kuva aho umutwe wa gisirikare wahiritse ubutegetsi bwa Perezida Ibrahim Boubacar Keïta nyuma y’imyigaragambyo yo kumweguza yabaye mu kwezi kwa munani 2020.

Usibye gufunga imipaka, CEDEAO kandi yafashe ingingo yo gufata umutungo wa Mali uri muri banki nkuru ihuza ibi bihugu, BCEAO. Ibi bihugu kandi byafashe ingingo yo gucyura ababihagarariye mu gihugu cya Mali.

Leta ya gisirikare ya Mali nayo mu kwihorera yahise itangaza ko ifunze imipaka y’ikirere n’iy’ubutaka isangiye n’ibihugu bya CEDEAO/ECOWAS hanyuma nayo itumaho abayihagarariye muri ibyo bihugu.

Itangazo aba bategetsi ba gisirikare basohoye, bavuze ko biyamye “Bivuye inyuma ibi bihano binyuranye n’amategeko byafatiwe iki gihugu“.

Aba bategetsi ba Mali ubu bavuga ko amatora ashobora kuba mu myaka itanu iri imbere ibyo ishyirahamwe rihuza akarere ridashobora kwemera.

Mu bihe bishize, ibihano byagize akamaro, ariko rero mu mwaka ushize, igisirikare cyasubiye guhirika ubutegetsi bwa gisivire, ibihugu by’Akarere bikaba biri mu igeragezwa yo kwerekana ko koko bishobora guhagarara ku ngingo yabyo, yo kugira ngo abo bategetsi ba gisirikare basubize ubutegetsi abasivile, nubwo igisirikare gikomeje kumvikanisha ko hari ibyo kigishyira ku murongo.

@Rebero.co.rw

Leave a Reply

Your email address will not be published. Required fields are marked *