Ethiopia yashinje UN kwirengagiza ibyashenywe n’inyeshyamba zo muri Tigray

Ethiopia yashinje akanama k’uburenganzira bwa muntu k’umuryango w’abibumbye, ishami rya ONU ryita ku burezi, ubumenyi n’umuco (UNESCO) n’ishami rya ONU ryita ku buzima (OMS/WHO) kwirengagiza ibyashenywe mu turere two mu majyaruguru y’igihugu, duherutse kwisubizwa n’ingabo za leta n’imitwe ifatanyije na zo zitwambura inyeshyamba zo muri Tigray.

Leta ya Ethiopia yavuze ko ayo mashami ya ONU acecetse ku ihohoterwa n’isenywa ry’amashuri n’amavuriro bivugwa ko byakozwe n’izo nyeshyamba.

Ku wa gatatu, Kebede Desissa, Minisitiri wungirije wa Ethiopia wo gutangaza amakuru, yabwiye abanyamakuru mu murwa mukuru Addis Ababa ko amavuriro abarirwa mu bihumbi yashenywe.

Gusa kugeza kuri ubu ONU ntiragira icyo ibisubizaho.

Umubano wa leta ya Ethiopia na ONU wajemo agatotsi kuva iyi ntambara yatangira mu kwezi kwa cumi na kumwe mu mwaka ushize, itangiriye mu karere ka Tigray mu majyaruguru y’igihugu.

Iyi ntambara yateje amakuba mu mibereho, ndetse uko imirwano yagutse ikagera mu turere bihana imbibi twa Afar na Amhara, ni na ko abicwa hamwe n’ibisenywa byiyongereye.

Impande zihanganye muri iyi mirwano zishinjanya gukora ubwicanyi ndengakamere.

@REBERO.CO.RW

Leave a Reply

Your email address will not be published. Required fields are marked *