Barbados mu nzira za Repubulika yatoye perezida wayo wa mbere

Barbados yatoye perezida wayo wa mbere mu gihe iri kwitegura kuba Repubulika, ikavanaho Umwamikazi Elizabeth nk’Umukuru w’Igihugu.

Inkuru dukesha BBC ivuga ko Dame Sandra Mason, w’imyaka 72, biteganyijwe ko azarahira tariki 30 z’ukwezi kwa 11, izaba ari isabukuru y’imyaka 55 y’ubwigenge bw’iki gihugu ku Bwongereza.

Sandra Mason wabaye umugore wa mbere wakoze mu rukiko rw’ubujurure, yari asanzwe ari guverineri mukuru wa Barbados kuva mu 2018.

Umwaka ushize nibwo leta yari akuriye yatangaje ko ishaka guhindura uko igihugu gifatwa kikaba repubulika.

Itangazo ryayo ryagize riti: “Igihe kirageze ngo Barbados isige inyuma byuzuye amateka y’ubukoloni. Izi mpinduka zari zarifujwe mu itegekoshinga ryavuguruwe mu 1998“.

Amatora y’amateka yabaye kuwa gatatu yabanje kwemezwa n’abagize inteko na sena y’iki gihugu.

Barbados ifite abaturage 285,000, ni kimwe mu birwa bituwe cyane mu bindi bigize Karayibe.

Mbere ubukungu bwacyo bwari bushingiye ku kohereza isukari mu mahanga ariko ubu gikura no mu bukererarugendo n’ishoramari.

Barbados ntabwo izaba igihugu cya mbere cyahoze gikoronizwa n’Ubwongereza muri Karayibe kibaye repubulika.

Ibihugu Umwamikazi Elisabeth ariwe ukibiyobora mu bwami bwe

Guyana yateye iyo ntambwe mu 1970 hatarashira imyaka ine ibonye ubwigenge, Trinidad na Tobago byakurikiyeho mu 1976, na Dominica mu 1978. Jamaica nayo mu gihe cyashize yavuze ko ishaka kureba uko yakora izo mpinduka.

@Rebero.co.rw

Leave a Reply

Your email address will not be published. Required fields are marked *