Covid-19: Ubushinwa ‘bwanze gutanga amakuru’ ku itsinda ry’ishami ry’umuryango w’abibumbye ryita ku buzima (OMS/WHO)

Ubushinwa bwanze gutanga amakuru y’ingenzi ngo buyahe itsinda ry’ishami ry’umuryango w’abibumbye ryita ku buzima (OMS/WHO) ririmo gukora iperereza ku nkomoko za Covid-19, nkuko umwe mu bagize iryo tsinda yabivuze.

Profeseri Dominic Dwyer yavuze ko itsinda arimo ryahawe gusa incamake y’amakuru y’ingenzi ryashakaga

Profeseri Dominic Dwyer yavuze ko itsinda arimo ryahawe gusa incamake y’amakuru y’ingenzi ryashakaga

Profeseri Dominic Dwyer, impuguke mu bumenyi bw’udukoko tutabonwa n’amaso yonyine, yabwiye ibitangazamakuru Reuters, Wall Street Journal na New York Times ko itsinda arimo ryasabye amakuru y’umwimerere ajyanye n’abarwayi ba mbere ba Covid-19, icyo yise ko ari “ibintu bisanzwe bikorwa”.

Yavuze ko icyo bahawe gusa ari incamake y’ayo makuru. Ubushinwa ntabwo burasubiza kuri ibyo birego, ariko mbere bwashimangiye ko bukorera mu mucyo mu mikoranire yabwo na OMS.

Leta Zunze Ubumwe z’Amerika zashishikarije Ubushinwa kugaragaza amakuru ajyanye n’ibihe bya mbere by’iki cyorezo, zivuga ko “zihangayikishijwe bikomeye” n’ibikubiye mu cyegeranyo cya OMS.

Mu cyumweru gishize, itsinda rya OMS ryafashe umwanzuro ko “bisa n’ibidashoboka cyane” ko coronavirus yaturutse mu cyumba cy’ubushakashatsi cyo mu mujyi wa Wuhan, ritesha agaciro ibyo bitavugwaho rumwe byavuzwe bwa mbere mu mwaka ushize.

Umujyi wa Wuhan ni ho hantu ha mbere ku isi hatahuwe iyi virusi, mu mpera y’umwaka wa 2019. Kuva icyo gihe, ku isi hamaze gutangazwa abantu barenga miliyoni 108 bayanduye, muri bo abarenga miliyoni 2,3 yarabishe.

Iri tsinda ry’abakora iperereza ku nkomoko za Covid-19 bari basabye amakuru y’umwimerere ku bantu 174 basanzwemo Covid-19 i Wuhan mu kwezi kwa 12 mu mwaka wa 2019, nkuko Profeseri Dwyer yabibwiye ibiro ntaramakuru Reuters.

Yavuze ko uko kwimwa ayo makuru bizashyirwa mu cyegeranyo cya nyuma cy’iri tsinda rya OMS, gishobora gutangazwa mu cyumweru gitaha.

Iri tsinda ry’abakora iperereza ryageze mu Bushinwa mu ntangiriro y’ukwezi kwa mbere uyu mwaka, rimara ibyumweru bine muri icyo gihugu – birimo ibyumweru bibiri bya mbere bamaze bari mu kato muri hoteli.

Src: BBC.com

Leave a Reply

Your email address will not be published. Required fields are marked *