Kevin Muhire nawe yagize icyo avuga ku makuru amugarura muri Rayon Sports

Umukinnyi w’ikipe ya Misr Lel Makkasa yatije muri El Geish, Muhire Kevin yahakanye amakuru avuga ko yaba agiye kugaruka muri Rayon Sports nk’uko bimaze iminsi bivugwa cyane ko agifite amasezerano mu Misiri.

Muri iyi minsi muri Rayon Sports hari inkuru nyinshi zitandukanye, bitewe n’ibihe iyi kipe irimo, gutakaza abakinnyi benshi, bivugwa ko yaba iri mu biganiro na bamwe mu bakinnyi bahoze bayikinira ngo babe bagaruka.

Amazina yakunze kugenda agaruka ni Yannick Mukunzi, Caleb ndetse na Muhire Kevin bivugwa ko yaba irimo ishaka uko yabagarura.

Mu kiganiro yagiranye n’ikinyamakuru ISIMBI dukesha iyi nkuru, Muhire Kevin yavuze ko ayo makuru ari ibihuha ko agifite umwaka w’amasezerano mu Misiri kandi akaba adateganya no kugaruka gukina mu Rwanda.

Yagize ati“reka reka, umuntu ajya mu ikipe atavugana n’umuntu n’umwe waho? Ntabwo birimo pe, nanjye mbyumva gutyo. Njye ndacyafite umwaka hano mu Misiri.”

Uyu musore akaba asoje imyaka 2 mu myaka 3 yari yasinyiye ikipe ya Misr Lel Makkasa, gusa ngo kugaruka gukina mu Rwanda si inzozi arota vuba aha.

Muhire Kevin nyuma yo kuva muri Centre ya Gikondo yinjiye mu Isonga muri 2013, yamazemo imyaka 2 maze muri 2015 yerekeza muri Rayon Sports yakiniye kugeza muri 2018 mbere y’uko yerekeza mu Misiri.

@rebero.co.rw

Leave a Reply

Your email address will not be published. Required fields are marked *