Kakule Mugheni Fabrice yasubije abakomeje kumwerekeza muri Tanzania

Nyuma yo gusezera ikipe ya Rayon Sports akavuga ko atazakomezanya na yo umwaka utaha w’imikino, Mugheni Kakule Fabrice, inkuru nyinshi zikomeje kumwerekeza mu gihugu cya Tanzania mu ikipe ya Yanga ndetse aho bavuga ko n’ibiganiro bigeze kure, gusa uyu musore ahamya ko ataramenya aho azerekeza.

Tariki ya 6 Kamena 2020, ni bwo Kakule Mugheni Fabrice yasezeye kuri Rayon Sports avuga ko batazakomezanya umwaka utaha w’imikino, ni nyuma yo gusoza amasezerano ye y’imyaka 2.

Ibinyamakuru bitandukanye muri Tanzania birimo Championi bitangaza ko uyu musore ashobora kwerekeza muri Yanga ni nyuma y’uko ubuyobozi bwa GSM, kompanyi itera inkunga ikipe ya Yanga bwamusabye amashusho ye.

Gusa uyu musore we avuga ko n’ubwo yamaze gusezera Rayon Sports ariko ngo ntaramenya aho azerekeza, byose bizamenyekana mu gihe nyacyo.

Yagize ati“nahisemo gusezera abafana b’ikipe yanjye kugira ngo icyo bazabona cyose ntibazatungurwe. Ntabwo byanyorohera kuvuga ngo nzerekeza aha, kuba nasezeye byonyine menya ko nzagenda uyu mwaka w’imikino urangiye, ibintu nibirangira abantu bazamenya aho nzajya.”

Kakule Mugeni Fabrice yinjiye muri Rayon Sports muri 2015 ayivamo 2017 agiye muri Kiyovu Sports yakiniye umwaka umwe maze muri 2018 asubira muri Rayon Sports akaba yari asojemo amasezerano y’imyaka 2.

@rebero.co.rw

Leave a Reply

Your email address will not be published. Required fields are marked *