Mu Karere ka Gisagara Hamaze gufatwa abagabo 89 bakekwaho gutera inda abangavu

Abagabo bagera kuri 89 nibo bamaze gutabwa muri yombi mu Karere ka Gisagara bakurikiranyweho icyaha bakekwaho cyo gusambanya abangavu no kubatera inda mu 2019.

Ikibazo cy’abangavu baterwa inda imburagihe kimaze igihe kigaragara hirya no hino mu gihugu ndetse uko umwaka utashye imibare y’abaziterwa igenda yiyongera.

Umukozi ushinzwe ubiringanire n’iterambere ry’umuryango mu Karere ka Gisagara, Sewabo Vincent, avuga ko kugeza ubu babaruye abangavu bari munsi y’imyaka 17 y’amavuko bagera 214 batewe inda mu mezi 11 ashize.

Yavuze ko mu kwezi kwa mbere k’umwaka wa 2020 hagaragaye abangavu barindwi bari munsi y’imyaka 18 y’amavuko nabo batewe inda.

Imibare kandi yerekana ko mu Karere ka Gisagara abangavu bari munsi y’imyaka 20 y’amavuko batewe inda imburagihe mu 2019 barenga 400.

Imwe mu nzira yo gukemura icyo kibazo no kugikumira ni ugushakisha abagabo n’abasore babatera izo nda bagahanwa hakurikijwe amategeko kugira ngo bibere abandi urugero babicikeho.

Sewabo avuga ko hamaze gufatwa abagabo n’abasore 89 kandi bose banyujijwe mu bugenzacyaha.

Ati “Tumaze gufata abagabo 89 mu mwaka wose wa 2019 kandi bose banyuze imbere ya RIB. Abo twafashe ni abagaragara mu Karere kuko abandi ntabwo baba mu Karere.”

Yavuze kandi ko abari hanze y’akarere nabo bari gushakishwa ku bufatanye n’izindi nzego kugira ngo bakurikiranweho icyaha bakekwaho.

Sewabo yavuze bagendeye ku makuru bahawe n’abangavu barenga 400 batewe inda, hagomba gufatwa abagabo 106 bazibateye ariko muri bo hamaze gufatwa 89 abandi bakaba bagishakishwa.

Hari abimana amakuru

Umukozi ushinzwe ubiringanire n’iterambere ry’umuryango mu Karere ka Gisagara, Sewabo Vincent, yavuze ko hari abangavu baterwa inda bakanga kuvuga abagabo bazibateye ndetse n’ababyeyi babo bakabafasha guhisha amakuru.

Gusa ngo hari ababona ingaruka barimo guhura nazo bakiyemeza kuvugisha ukuri kugira ngo ababahohoteye babibazwe.

Ati “Ubu hari indi mibare dufite turimo gusesengura kuko ntabwo turarangiza imirenge yose; kuko iyo abana bahishe amakuru ariko nyuma bagahura n’ibibazo baragaruka bakavugisha ukuri uwabateye inda.”

Yongeye gusaba abangavu batewe inda gutinyuka bakavugisha ukuri ku bazibateye kugira ngo bahanwe bacike kuri iyo ngeso ndetse bibere abandi urugero.

Yavuze ko ababasambanya babashuka bagamije kubicira ubuzima; atanga urugero ku mwangavu baherutse kwakira avuga ko yatewe inda n’umugabo wajyaga amutwara kuri moto agiye ku ishuri.

Sewabo yasabye ababyeyi gukurikirana buri munsi uburere bw’abana babo by’umwihariko abakobwa kandi bamenya ko hari uwabasambanyije bagahita babimenyesha inzego z’ubuyobozi n’iz’umutekano.

@rebero.co.rw

Leave a Reply

Your email address will not be published. Required fields are marked *