Abasirikare b’u Burundi mu myitozo ikaze nyuma yo guteguzwa kugabwaho ibitero

Abasirikare b’u Burundi bamaze iminsi bari mu myitozo ikaze yo kurwanya ibitero by’iterabwoba, ni mu gihe iki gihugu kitegura amatora y’umukuru w’igihugu azaba umwaka utaha kandi hari imitwe itandukanye irwanya Leta iriho bikekwa ko yaba kidobya bitewe n’integuza yagiye itanga.

Ni imyitozo yabereye mu Ntara ya Muramvya mu kigo cya gisirikare kizwi nka Brigade d’Artillerie kikaba kibarizwamo abasirikare kabuhariwe ndetse n’ibirwanisho bikomeye by’igisirikare cy’u Burundi.

Ikinyamakuru cy’i Burundi, bujatoday gitangaza ko iyi myitozo yari ifite intego yo kongerera abasirikare b’iki gihugu ubumenyi bujyanye no kurwanya imitwe y’iterabwoba n’ibindi bitero mu gihe igihugu cyaba cyabigabweho.

Igisirikare cy’u Burundi ni kimwe mu bifite abasirikare benshi boherejwe mu butumwa bwo kugarura amahoro muri Somalia, République centrafricaine. Ibi bivuze ko nacyo kitakwirara ngo gisinzire mu gihe abo baba bahanganye nabo muri ibi bihugu basubira inyuma bakabagabaho ibitero by’iterabwoba.

Igisirikare cy’u Burundi kandi kiri muri iyi myitozo yo guhangana n’ibitero by’iterabwoba n’ibindi bishobora kugabwa ku butaka bwabo mu gihe kirimo gutegura amatora y’umukuru w’igihugu kandi gifite abakeba benshi bahoro bagiteguzaho intambara.

Mu mwaka wa 2015, ubwo Perezida Nkurunziza yiyamamazaga kuri manda ya gatatu abaturage bose batavugagaho rumwe, nibwo havutse imvururu bamwe mu basirikare, abapolisi, abanyapolitiki n’abandi baturage basanzwe barahunga.

Nyuma yo guhunga kwabo kwaje mbere gato y’igerageza ryo guhirika ubutegetsi bwa Nkurunziza ryabaye ku wa 13 Gicurasi 2015, na nyuma yaho, bamwe mu basirikare bagiye bumvikana mu itangazamakuru bavuga ko biteguye kugaba ibitero.

Mu mwaka wa 2015, ubwo habagaho igerageza rya kudeta bikarangira ipfubye ni abasirikare benshi n’abapolisi bahunze, bityo aho bagereye hanze bakomeje gutangaza ko aho bagiye batarimo kurera amaboko, ko umunsi nugera bazagaba ibitero.

Nyuma y’imyaka ibiri yari ishize Gen Niyombare Godefroid wari uyoboye uwo mugambi wa kudeta atavuga, mu mwaka wa 2017 aganira na Jeune Afrique yeruye ko isaha ku isaha bazubura umugambi wabo.

Gen Niyombare wari uyoboye kudeta

Aha yagize ati “Ubutegetsi bwa Bujumbura nta gaciro buha ibi biganiro. Kuri Forebu, birashoboka ko intambara y’intwaro yabirangiza umunsi umwe. Ubu ubwacu twabaye turetse kugaba ibitero ku birindiro bya gisirikare, icyo mu Ukuboza 2015 cyagenze nabi kuko tutari twiteguye. Turimo kwisuganya kugira ngo tuzatere umunsi umwe.
Hari umubano dufitanye n’ingabo z’u Burundi, aho twiteguye ubufasha, ibikorwa byacu dutegura nibiramuka bigenze neza bizabyara impinduka.”

Yongeyeho ko ibihumbi by’abasirikare birimo abajenerali mirongo byashoboye guhunga igihugu nta kibahungabanyije. Ati “Mu Ukuboza 2015, twashinze Forebu, ihuriyemo ingabo n’abapolisi bari bashyigikiye kudeta”. Uyu mutwe w’inyeshyamba yakomojeho ni umwe mu irwanya Leta y’u Burundi ibarizwa mu mashyamba ya Congo hamwe n’indi irimo Red-Tabara, FLN,…

Niyombaye yatangaje aya magambo nyuma y’ayatangajwe na Gen Habarugira Philbert na we ubarizwa mu buhungiro, wagize ati “Abajenerali bari mu buhungiro ni benshi, harimo njye ubwanjye, hari n’abandi, kandi si abajenerali gusa, hari ba koloneli, majoro, kapiteni n’abandi basirikare bari kumwe natwe bashaka gukomeza igikorwa nk’icyo twakoze ku wa 13 Gicurasi (2015)”.

Gen de Brigade Leonard Ngendakumana wahoze ari umuyobozi wungirije w’urwego rw’iperereza mu gihugu cy’u Burundi, mu 2016 aganira na televiziyo yo muri Kenya (KTN), na we yagize ati “Nkurunziza ko agomba kurekura ubutegetsi, kandi ibi tuzabikora ku ngufu dushyiraho umutwe wa gisirikare, turi abajenerali 12 b’igisirikare cya Leta na polisi, ikindi kandi dufite minisitiri w’ingabo uturi inyuma, twizeye intsinzi”.

Nyuma y’izi nteguza zose z’intambara, u Burundi bumaze kugabwaho ibitero mu bice by’igihugu bitandukanye bigahitana n’ubuzima bw’abarimo n’abasivile. Igiheruka kikaba cyaragabwe i Mabayi, ku wa 17 Ugushyingo 2019, ku birindiro by’ingabo z’u Burundi, kikagwamo abagera kuri 38, nyuma hakigamba umutwe wa FRB-Abarundi.

N’ubwo abatavuga rumwe na Leta bateguza Nkurunziza intambara banamusaba kuva ku butegetsi, umwaka ushize yatangaje ko amatora yo mu 2020 ataziyamamaza n’ubwo hari abatarabyemera nk’ukuri.

@rebero.co.rw

Leave a Reply

Your email address will not be published. Required fields are marked *