Rusizi: Abamotari bakanguriwe kugira uruhare mu kurwanya impanuka zo mu muhanda

Mu rwego rwo gukomeza gukangurira abakoresha umuhanda kubahiriza amategeko no kwirinda impanuka cyane cyane abatwara ibinyabiziga, Polisi ikorera mu karere ka Rusizi yagiranye ibiganiro n’abamotari bakorera mu murenge wa Kamembe, mu mujyi wa Rusizi.

Abamotari bitabiriye ibi biganiro n’abibumbiye muri imwe mu makoperative akorera mu mujyi wa Rusizi yitwa COMORU (Cooperative Motard de Rusizi) igizwe n’abanyamuryango barenga 160.

Aganira n’aba bamotari, Senior Supertendent of Police (SP) Athanase Ruganintwari, umuyobozi wa Polisi mu karere ka Rusizi yasabye aba bamotari kwirinda impanuka zo mu muhanda kuko zikomeje gutwara ubuzima bwa benshi.

Yagize ati:” Buri muntu wese akenera kubaho kandi akabaho neza, ntawakwishyira urupfu, niyompamvu mwebwe abamotari tubasaba kujya mu bungabunga ubuzima bw’abo mutwara mu gihe cyose muri mu muhanda. Burya umuhanga w’ikinyabiziga ni uwubahiriza amategeko y’umuhanda akanubaha ubuzima bw’abandi bawukoresha.”

Yakomeje ababwira ko impanuka zihitana ubuzima bwa benshi abandi zikabasigira ubumuga kandi kenshi izikunze kuba ziterwa n’abamotari. SP Ruganintwari yababwiye ko impanuka nyinshi ziterwa n’ubusinzi ,uburangare, umuvuduko ukabije ndetse n’abatwara ibinyabiziga  bavugira kuri telefoni.

Yanabasabye kwirinda gutwara ibiyobyabwenge kuko nabyo biri mu bituma bakora impanuka.

Yakomeje agira ati:” Iyo utwaye moto cyangwa ikindi kinyabiziga urangariye muri telefoni byanze bikunze ukora impanuka cyangwa ukayiteza abandi. Ikindi kandi iyo utwaye ibiyobyabwenge cyangwa ibicuruzwa bya magendu utwara nabi kuko  ugenda wiruka wihishahisha wikanga ko wafatwa, ibi nabyo bikaba byateza impanuka”.

Yasoje abasaba gukomeza  ubufatanye na Polisi birinda impanuka bazirinda n’abandi no kurwanya ibiyobyabwenge na magendu. Abasaba kujya bihutira gutanga amakuru igihe babonye umuntu ufite ibiyobyabwenge cyangwa bamukeka.

Umunyamabanga nshingwabikorwa w’umurenge wa Kamembe, Nsengiyumva Vincent de Paul yasabye aba bamotari kujya bubahiriza gahunda za leta, zirimo gutanga umusanzu w’ubwisungane mu kwivuza,kwitabira umuganda ndetse no kwibumbira mu makoperative kuko bizatuma barushaho kunoza ibyo bakora bityo iterambere n’imibereho myiza bikagerwaho mu gihe gito.

Uhagarariye iyi koperative y’Abamotari Kayigire Vincent yashimiye Polisi idahwema kubibutsa kubahiriza umutekano wo mu muhanda bakumira impanuka, asaba bagenzi be kubahiriza amategeko no kujya batanga amakuru kugirango ibyaha bikumirwe.

Rebero.co.rw

Leave a Reply

Your email address will not be published. Required fields are marked *