Urubyiruko rw’abakorerabushake rwasoje amahugurwa rwiyemeje kurushaho kurwanya ibyaha biri mu muryango nyarwanda

Kuri iki cyumweru tariki 11 Ugushyingo 2018  nibwo ku kicaro gikuru cya Polisi y’u Rwanda hasojwe amahugurwa y’iminsi ibiri yahuzaga urubyiruko rw’abakorerabushake mu kurwanya no gukumira ibyaha.

Umuyobozi wungirije muri Polisi y’u Rwanda ushinzwe imiyoborere n’abakozi DIGP Juvenal Marizamunda

Uru rubyiruko  rwiyemeje  kurushaho kurwanya ibyaha bikomeje kwibasira umuryango nyarwanda nk’ibiyobyabwenge, ibyaha byo gusambanya abangavu bakanaterwa inda,ihohotera rishingiye ku gitsina ndetse n’ikibazo ki gwingira ry’abana.

Amahugurwa yatangwaga n’abayobozi batandukanye ku rwego rw’igihugu,urubyiruko rukaba rwarongerewe ubumenyi ku kurwanya ibyaha bijyanye n’icuruzwa ry’abantu,ihohotera rishingiye ku gitsina, kuboneza imirire cyane cyane ku bana bari munsi y’imyaka 5 n’ibindi bitandukanye.

Minisitiri w’uburinganire n’iterambere ry’umuryango, Madamu Nyirahabimana Solina,Niwe wari umushyitsi mukuru 

Ubwo hasozwaga aya mahugurwa ku mugaragaro,umyobozi mukuru yari  Minisitiri w’uburinganire n’iterambere ry’umuryango, Madamu  Nyirahabimana Solina,hari kandi Umuyobozi wungirije muri Polisi y’u Rwanda ushinzwe imiyoborere n’abakozi DIGP Juvenal Marizamunda ndetse n’umuhuzabikorwa w’urubyiruko rw’abakorerabushake ku rwego rw’Igihgu, Murenzi Abdallah.

Minisitiri Nyirahabimana yashimiye abateguye aya mahugurwa,  anashimira urubyiruko rwayitabiriye ukuntu rwaranzwe n’umurava n’ikinyabupfura.

Minisitiri Nyirahabimana yashimiye urubyiruko rw’abakorerabushake ukuntu rukomeje gutanga umusaruro ugaragara mu kurwanya no gukumira ibyaha mu muryango nyarwanda ndetse n’uruhare rwabo mu iterambere ry’igihugu.

Uru rubyiruko rwiyemeje kurushaho kurwanya ibyaha bikomeje kwibasira umuryango nyarwanda

Yagize ati:”Ibyo mukora hirya no hino mu gihugu byunganira politiki ya leta ku mibereho y’abanturage,uko mukomeza gutanga ubukangurambaga mu baturage mujye mushyira imbaraga mu gushishikariza ababyeyi kuboneza indryo y’abana kugira ngo bakure neza,bityo turwanye igwingira ry’abana.”

Yakomeje asaba uru rubyiruko kuzahugura bagenzi baabo basigaye hirya no hino mu gihugu kujya barangwa n’indangagaciro, birinda kujya mu bikorwa bibi birimo gukoresha ibiyobyabwenge no kwishora mu busambanyi.

Murenzi Abdallah,umuhuzabikorwa w’urubyiruko rw’abakorebushake ku rwego rw’igihugu yavuze ko muri aya mahugurwa urubyiruko rwahungukiye ubumenyi bwinshi bwiyongeraga kubwo bari basanganywe ndetse ko ubwo bumenyi bazabusangiza bagenzi babo batashoboye kuza muri ayo mahugurwa.Avuga ko yizeye ko nta kabuza azagira akamaro mu muryango nyarwanda.

Yagize ati:”Turashaka gushyira imbaraga ku bukangurambaga mu midugudu,intego n’ugukangurira abaturage kwirinda ibyaha ahubwo bakihatira gukora ibikorwa bibateza imbere bikanateza imbere Igihugu muri rusange.”

Biteganyijwe ko nyuma y’aya mahugurwa,urubyiruko rwahuguwe rugiye guhita ruhugura urundi byibura mu murenge,akagari n’umudugudu hazagenda hahugurwa abantu batanu(5) nabo bakazahugura abandi.

Leave a Reply

Your email address will not be published. Required fields are marked *